CANTO APRENDEMOS COCIÑANDO!

Co alumnado de 2º B. 

Hoxe estivo na Cociña da Tomasa o derradeiro grupo de alumnado de 2º B. Estivemos cociñando crema de verduras e arroz con vexetais. 

Estes son os produtos da horta que empregamos: 

CREMA DE VERDURAS

1. Lavamos o porro, o pemento, o apio, a leituga e as acelgas. 

2. Troceámolos en anacos grandes e pómolos na ola. 

3. Pelamos a pataca. Lavámola, troceámola e pómola na ola. 

4. Pelamos a cebola. Troceámola e botámola na ola. 

5. Engadimos sal e auga, 

6. Pomos a ola na cociña. 

7. Cando a pataca estea branda retirámola. 

8. Pasamos todo polo batedor. 

9. Engadimos os queixos en porcións e seguimos batendo. 

ARROZ VEXETAL

1. Pelamos a cebola e picámola en anaquiños pequenos.

2. Lavamos o porro, o pemento, o tomate, os tirabeques e as acelgas da horta. Picámolos en anaquiños pequenos. 

3. Debullamos as fabas. Sacámoslle a pel coa punta dun coitelo ou coa unlla. 

4. Pelamos a cenoria. Lavámola e cortámola en cadradiños pequenos. 

5. Botamos todos os ingredientes anteriores nun wok con sal e un pouco de aceite. 

6. Pomos o wok na cociña. 

7. Cando estea bastante feito engadimos un vaso de arroz. 

8. Removemos cunha culler de pau.

9. Engadimos dous vasos de auga. 

10. Deixamos facer a lume forte. 

11. Cando case non quede auga botamos as fabas.

Todo o proceso que temos exposto foi documentado polo propio alumnado. Así xurdiu un extenso álbum de fotos con encuadres dignos de grandes fotógrafos. Quen sabe o que nos deparará esta cativada! Se premedes na seguinte imaxe accederedes ó álbum. 

Pero o máis sustancioso foi compartir mesa coa cativada. E alí eles mesmos analizaron o traballo desenvolvido, e descubriron moitas das cousas que aprenderon: 

• fixeron tarefas que nunca antes desenvolveran (cociñar, fregar); 
• aprenderon a relaxarse, cociñando ou debullando; 
• traballaron a motricidade fina; 
• practicaron a virtude da paciencia (que importante!)
• empregaron vocabulario en galego;
• traballaron en equipo, axudándose os uns ós outros; 
• probaron ingredientes que nunca antes comeran;
• compartiron saberes (por exemplo: Abril aprendeunos a linguaxe dos cubertos: como dicir que a comida nos gustou moito).

Por último, teño que felicitar a este grupo de cativos e cativas, pero tamén ás súas familias. Ningún outro grupo anterior esforzouse tanto por colaborar e deixar as instalacións da nosa cociña tan limpas e ordeadas. 

Parabéns por aprenderlles tan ben, papás e mamás!