CHARLA SOBRE AUTISMO

A semana pasada o Departamento de Orientación organizou no centro unha charla moi especial con Marlene Horna Castiñeiras. 

A súa intervención foi moi enriquecedora e axudounos a comprender mellor como viven, senten e aprenden os nenos e nenas con autismo, así como o papel tan importante que temos como educadores  na súa inclusión.

Marlene explicounos que o autismo non é igual en todas as persoas, pero adoitan compartir algúns rasgos comúns, como:

- Dificultade para comprender normas sociais ou interpretar xestos e emocións.

- Intereses moi intensos por certos temas ou actividades.

- Necesidade de rutinas e orde para sentirse seguros.

- Hipersensibilidade ou hiposensibilidade a sons, luces ou texturas.

- Formas diferentes de comunicarse: poden falar pouco, usar ecolalias ou empregar outros medios para expresarse.

A charla tamén deunos moitas ideas prácticas para favorecer a inclusión e a convivencia positiva:

- Manter rutinas claras e estruturadas, co apoio de pictogramas ou axendas visuais.

- Falar con linguaxe sinxela e directa, evitando dobres sentidos

- Ofrecer tempos de calma e espazos tranquilos cando o neno ou nena o precise.

- Valorar e potenciar os seus intereses especiais como punto de partida para a aprendizaxe.

- Promover a empatía e o respecto entre o grupo, explicando que todos aprendemos dun xeito diferente.

Esta charla  foi unha oportunidade marabillosa para abrir os ollos e coñecer mellor todos os aspectos que engloba o autismo. 

Grazas pola túa visión.