ALUMNADO BIBLIOTECARIO

Na nosa biblioteca escolar, contamos cun equipo moi especial: o alumnado bibliotecario. Nenos e nenas de 5º e 6º de primaria que día a día acuden á biblioteca para colaborar, axudar, aprender e para facer da biblioteca un espazo máis vivo, organizado e acolledor.

Ao longo do curso, o alumnado bibliotecario participa en diversas tarefas:

- Organización e clasificación dos libros: Axudan a colocar os libros no seu lugar segundo o sistema de clasificación da biblioteca, mantendo as estanterías ordenadas e accesibles para todo o alumnado.

- Atención ao público: Durante os recreos colaboran no servizo de préstamo e devolución, rexistrando os libros no catálogo. 

- Animación á lectura: Participan en actividades de animación á lectura, recomendan libros mediante exposicións ou seccións destacadas por temáticas, preparan contacontos para o alumnado de infantil en datas sinaladas... 

- Coidado do espazo: Axudan a manter a biblioteca limpa e coidada, vixiando que se respecten as normas de convivencia e animando ao resto do alumnado a facer un bo uso dos materiais e instalacións.

Ser parte deste equipo é unha experiencia enriquecedora pois o alumnado desenvolve habilidades de responsabilidade, traballo en equipo, compromiso e autonomía. 

Polo que queremos dar as grazas a todo o alumnado bibliotecario polo seu esforzo, dedicación e entusiasmo!