III ENCONTRO DE CLUBES DE LECTURA CON PERE TOBARUELA

 A biblioteca acolleu recentemente o III Encontro dos Clubes de lectura do Ceip Castelao e do Seis do Nadal, unha cita moi especial que contou coa presenza do escritor Pere Tobaruela, autor do libro Formigas: misión Samaín.

Durante a sesión, o alumnado tivo a oportunidade de conversar directamente co autor, compartir impresións sobre o seu libro e afondar nos temas que percorren a historia. Pere Tobaruela falou sobre a orixe do libro, o proceso creativo e os personaxes, ofrecendo unha visión próxima e enriquecedora que permitiu redescubrir a obra desde novas perspectivas.

A conversa foi dinámica e participativa, con preguntas, reflexións persoais e momentos de intercambio que puxeron de manifesto o interese e a implicación do club de lectura.  Foi unha experiencia moi enriquecedora tanto para os lectores e lectoras como para o propio autor.

Desde a biblioteca queremos agradecer a Pere Tobaruela a súa dispoñibilidade e xenerosidade, así como a todas as persoas asistentes por facer posible este encontro literario. Actividades coma esta reforzan o papel da biblioteca como espazo de diálogo, cultura e promoción da lectura.