ROTEIRO CON PEDRO FEIJOO

 Os alumnos e alumnas de 5º e 6º de Primaria do clube de lectura do colexio, acompañados polo alumnado do CEIP Seis do Nadal, viviron unha experiencia moi especial xunto ao escritor vigués Pedro Feijoo, autor do libro Pequena historia de Vigo. Durante esta actividade, os nenos e nenas tiveron a oportunidade de descubrir curiosidades sobre a historia da nosa cidade e coñecer de primeira man como nace un libro.

A través das páxinas de Pequena historia de Vigo, o alumnado fixo unha viaxe no tempo desde o Vigo castrexo ata a actualidade, coñecendo episodios importantes da cidade dun xeito divertido e moi visual. O libro, ilustrado por Xosé Tomás, combina o formato de álbum ilustrado e cómic para achegar a historia de Vigo aos máis novos.

Durante o encontro, Pedro Feijoo compartiu anécdotas sobre o proceso de creación do libro e explicou a importancia de coñecer a historia e a identidade da nosa cidade. Os rapaces e rapazas participaron con moito interese, realizando preguntas, comentando detalles da lectura e demostrando todo o que aprenderon.

Foi unha xornada moi enriquecedora na que literatura, historia e convivencia se uniron para fomentar o gusto pola lectura e o coñecemento do noso patrimonio cultural.

Queremos agradecer a Pedro Feijoo a súa visita, a súa cercanía e a ilusión coa que compartiu esta experiencia co alumnado. Sen dúbida, unha actividade que quedará na memoria de todos e todas.