E POR QUE NON POMOS UN RESTAURANTE?
Gratis, e que poidan vir os pais.
Con estas propostas tan entusiastas e espontáneas rematou o Obradoiro de Cociña desenvolvido co último grupo de alumnos e alumnas de 1º A. Un tempo de aprender, convivir e compartir que nos permitiu tamén ir buscar produtos á horta e sorprendernos cos coñecementos dalgúns cativos e cativas:
- Iso é fiuncho, que o vou buscar sempre coa miña avoa
- Esta é acelga amarela. Seino porque vou coa miña nai ó horto de Navia
- As verzas collémolas na casa dos meus avós para que coman as galiñas
Hoxe cociñamos un prato único: pisto con ovos. Deunos bastante traballo trocear todo, e as perspectivas dalgúns acerca de que o prato lles gustase non resultaban moi prometedoras. Pero... finalmente, todos comemos, repetimos, e... incluso os que nunca o fan decidiron probar o ovo!
Tanto lles gustou, que andaban moi preocupados preguntando se lles podía enviar a receita ós seus papás para poder facela na casa.
Pois... meu dito, meu feito! Aquí vai a nosa receita.
Comezamos presentando os ingredientes que empregamos, acompañado dun pequeno debate: aceite ou manteiga?
- Pelamos a cebola e picámola. Botámola no wok.
- Lavamos o porro e o pemento. Picámolos e engadímolos ó wok.
- Pelamos a cenoria, lavámola e cortámola en taquiños. Engadimos.
- Botamos sal e aceite e pomos no lume.
- Lavamos a cabaciña e a berenxena. Cortámolas en taquiños e engadímolas ó wok.
- Lavamos as acelgas. Troceámolas coas tesoiras e engadímolas ó wok.
- Debullamos os chícharos e engadímolos.
- Lavamos os tomates cherry e engadímolos.
- Botamos un pouco de salsa de tomate.
- Pelamos as patacas. Lavámolas. Cortámolas en taquiños e botámolas ó wok.
- Engadimos auga e deixamos todo a cocer.
- Cando as patacas estean brandas engadimos os ovos, apagamos o lume e deixámolos facer co calor gardado, para que as xemas non se poñan duras.
- Acompañamos o noso prato con pan.
E para gozar de todo o proceso, se premedes na seguinte imaxe accederedes ó álbum de fotos.
A cociñar!
Comentarios