2 de ABRIL

Día Internacional do Libro Infantil.

Hoxe, data do nacemento de Hans Christian Andersen, celebramos o Día Internacional do Libro Infantil. Como cada ano, o IBBY convida a celebrar esta xornada de promoción da literatura infantil e xuvenil. E faino da man da escritora estadounidense Margarita Engle (que ten redactado o manifesto para esta conmemoración) e o ilustrador brasileiro Roger Mello. A tradución ó galego é de María Canosa. 

Cando lemos, á nosa mente médranlle ás.

Cando escribimos, os nosos dedos cantan.

As palabras son golpes de tambor e frautas na páxina,

paxaros voadores e elefantes trompeteiros,

ríos que flúen, fervenzas que caen,

bolboretas que viran

alto no ceo!

As palabras convídannos a bailar

ritmos, rimas, latexos do corazón,

cascos e bater de ás, contos antigos e novos,

fantasías e verdades.

Esteas cómodo na casa

ou atravesando veloz as fronteiras cara unha nova terra

e unha lingua estraña, as historias e poemas

perténcente.

Cando compartimos palabras, as nosas voces

vólvense música do futuro,

paz, alegría e amizade,

unha melodía

de esperanza.

Grandes e cativos anímannos a ler nesta xornada tan especial.

Feliz día!